折服影壇揸機佬

    當今於荷里活能響垛者，當數李小龍、成龍、李安、吳宇森。然真正令影壇權貴折服者，史上僅此一人，且係六、七十年前。此乃黃宗霑。

    黃公乃早期中國移民，無學無才，僅憑勤奮，腦筋靈活，唔演戲唔導演，只一味揸機。然經佢手，每片皆精，竟獲奧斯卡最佳攝影十度提名，兩度獲獎。鬼佬亦服到貼地，封佢“世界十一位最具影響力攝影師”，排名第四。當年種族極端歧視，華人能居此位，真功夫已絕非花巧。

    黃公絕招鬼佬絕對唔明。三十年代荷里活靚女明星瑪麗明特碧眼金髮，然拍出照片卻有眼無珠，目無神采。黃公略施妙計，鏡頭前墊幅黑天鵝絨，以絨黑映入美人眼簾，登時明眸皓齒，成個生晒。

    拍拳擊鏡頭，佢着住“撈拿”上擂台，人隨機轉，機隨拳動，動感張力，觀眾幾聞拳風，睇到鬼佬眼突。此乃影壇動感攝影第一人。

    今日乃黃公一百二十七齡冥壽。

    西門公子